جريدة مرايا

الحقيقة كما يجب

عمر الشريف يكتب: القطة مشمشة

القطة مشمشة
نو.. نو .. ناااااو….
يا قطة يا قط، أنا هنا فوق بأبص من فوق من البلكونة، أنا أسمي مشمسة، أنتم أساميكم أيه ؟
نفسي أنزل ألعب معاكم، بس باب المكتب مقفول، يا بختكم أنا قاعدة لوحدي طول الوقت، لكن أنتم بتلعبوا مع بعض وبتاكلوا مع بعض، وعندكم شارع واسع كبير مليان حاجات كثير بتسليكم، بصراحة عمو أسامة بيحبني قوي، من ساعة ما جابوني الجيران ليه يربيني من بعد ما خلفتني أمي وماتت، وعلطول بيأكلني ويشربني ويعتني بيا، بيطبطب عليا وباسمعه بيتكلم ويقول مشمشة حلوة ومخلياني مبسوط، أنا مش عايزة أبقى بايخة وناكرة للجميل، بس ساعات كثير بأبقى عايزة أهرب.
على فكرة مرة نسيوا باب المكتب مفتوح، خرجت ولقيت نفسي في الشارع، قابلت قط لذيذ قوي، لفينا مع بعض وقعدنا ندردش، اسمه قطقوط، استغربت أنه بيقولي إن نفسه يعيش فى بيت، لأن في الشارع ساعات قطط وكلاب وحشين بيضربوه، والدنيا بتبقى برد، ومش بيلاقي أكل.
عزمني على أكل كان مخبيه، كان طعمه غريب بس لذيذ، لكن يومها بطني وجعتني قوي، بعد ما لعبنا شوية لقينا قط كبير وحش قعد يجري ورانا ويخوفنا وكان حيضربنا، أنا جريت ووقفت عند باب المكتب وقعدت اخربش الباب، لغاية ما عمو أسامة خد باله وفتحلي ودخلت بسرعة.
من يومها وأنا محتارة، عايزة أهرب وأعيش معاكم بس خايفة، هو ممكن أنتم تطلعوا تقعدوا معايا هنا ؟ أنا عارفة أن ده مينفعش، طول الوقت قافلين الباب وبيقولوا علشان القطط متدخلش، هو بجد أنتم أوقات بتبقوا جعانين قوي وبتاكلوا الحاجات المقرفة دي؟
نو.. نو.. بتبصولي كده ليه، وكمان بتضحكوا، يعني علشان متلخبطة وبقول الكلام وعكسه، طيب هو أنتم يعني مش متلخبطين !
وبعد كام شهر مبقتش مشمشة لوحدها، وبقى في حد تلعب وتاكل معاه، وتهتم بيه وتاخد بالها منه، مشمشة خلفت قطقوطة صغننة جميلة جداً، بتجري وبتلعب وعم اسامة بياخد باله منها ومن امها مشمشة، وبيشربها كل يوم علبة لبن صغيرة، وبيأكلها بيضة مصلوقة بيقطعهلها قطع صغيرة، جنب الجبنة ولب العيش الفينو، وقطع اللانشون.

حول كاتب البريد