جريدة مرايا

الحقيقة كما يجب

حيرة مغترب

كتب  خالد البسيون
أنا أسف ..
بس أنا مبقيتش عارف أنا أبقى مين!
أنا اللي متمعشق في أرض البلد دي
ولا اللي كاره وعايز يهاجر!
ما بين حبال الذكريات عالق
ما بين طشاش الأمس وضباب النهار غارق
الزمن مبدع في تزييف الحقايق
مبقيتش عارف!
أنا ابن مين ..؟
ابن بكره بصراحته البذيئة!
ولا ابن الأمس وتزييف الحقيقة
في الحقيقة ..
مبقتش عارف/أنا المغني ولا منشد التواشيح
أنا المحافظ ولا صاحب الأفكار الجريئة
أنا اللي مانع لمس ايدك قبل اكليل الميثاق
ولا اللي واخد حضنك ميثاق!
أنا المُساق ولا صاحب الرأي الجريء!
نجم عشان خارج صوته من راسه بقى شاعر بذيء
كل القصص منعاني من حبك بس أنا حبيت
كل الحقايق رافضه إني أضمك بس أنا ضميت
خايف ..
معرفش ايه لزوم الخوف والعمر واحد
بس خايف!
النص دا لسه في بدايته ومنتهاش
ازاي هتقفل قصيدتك وانت هاش!
النص دا للفضفضة ..
كل أما أكون مزنوق في جملة
هرجعله تاني بحِجة انه منتهاش.

حول كاتب البريد