مــــــــــــرايـا

الحقيقة كما يجب

إحنا أولى

المشاهدات 133
شارك
  •  
  •  
  •  
  •  
  •  
  •  
  •  
  •  
  •  

وقت القراءة:1 دقيقة, 23 ثانية

 

بقلم الشاعرة / مرفت جابر
متابعة المستشار الإعلامى دكتور / سامح الخطيب

إحنا أولى …..

فوق وركّز شوف كلامك
ح تلاقيه بالفعل جارح
حبي عمره ما كان مصالح
قلبي صادق م البدايه
وامّا جيت والشوق معايا
كنت جيّه بشوق حقيقي
مش مُزيّف واصطناعي
فوق وركّز مش ح تلقى
للي قولته أي داعي
دانت لو ح تشوف صراعي
ويّا كل الناس عشانك
مش ح ترمي ف يوم ودانك
للي يتكلم عليّا
مش ح تسمح يوم لنفسك
أبقى بين إيدك ضحيّه

نفسي بس تفوق شويّه
من كلام الناس وتفهم
إنّهم حساد هدفهم
بالغرام أبداً ما ننعم
لو تفوق فعلا ح تندم
ع اللي قولته وع الظنون
حبي لك حد الجنون
مش مزيّف أو خديعه
حبّي خارق للطبيعه
ربما لدرجة عبادة
حاسده نفسي عشان غرامك
رغم عندي غرام زياده
حتى وقت ما كنت بابكي
كنت بابكي من السعاده
ليه تجيبلي المُر ساده
بالكلام اللي انت قولته

هاتلي شئ واحد عملته
كان لحبّك فيه إساءه
مش ح تلقى غير براءه
والدنائه من اللي حاول
يرمي ف ودانك معاني
فيها تعكير للمكان
إوعى تسمح للجبان
مهما كان يفسد غرامنا
بالغرام يا حبيبي كنا
وبوفائنا رح نعيش
إي حاجه ما تساوويش
يبقى ليه نضيّع ليالي
أو دقايق أو ثواني
واحنا فيها بجد أولى
بالغرام من حد تاني
ليه نسيب الشوق يعاني

كل يوم من شئ جديد
يا حبيبي فوق شويّه
داري ع الشمعات تقيد
د الغرام زي الوليد
ف الحياه قدّام عينينا
لجل يكبر لينا بينا
يبقى محتاج حد أقصى
من دفانا وم الحنان
إوعى تسمع للجبان
وان سمعت ف لحظه كلمه
إوعى قلبك يبقى أعمى
إنما يا حبيبي دايماً
فوق وركّز
بقلمى – مرفت جابر

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

شارك
  •  
  •  
  •  
  •  
  •  
  •  
  •  
  •  
  •